Snopes.com

An Snopes.com /ˈsnoʊps/, na bisto man sa apod na Urban Legends Reference Pages, sarong websayt na nag'oogid nanggad kan katotohanan kan mga rimong-rimong, huringhuding, mga huna-huna o mga sabi-sabi na naglalakop sa Internet, mga padara sa e-koreo asin ibang mga istorya na dai aram an hinalean o kun saen guminikan.^[1] An websityo bantog bilang toltolan sa pagpatotoo o pagpahimutik kan mga uru-osipon sa kulturang popular sa Amerika, mala ta nakakakua nin 300,000 na pagbisita aro-aldaw.^[2]

An Snopes.com minukna ninda Barbara asin David Mikkelson, mag'agom na taga-California na nagkasumpongan sa newsgroup na alt.folklore.urban. An sityo organisado sa mga papag'ulayan na kaiba an buletin nin mga mensahe kun saen siisayman pwede magtaplak nin mga istorya asin mga retrato na kwestyonable an pagkatotoo.

1. ↑ http://www.npr.org/templates/story/story.php?storyId=4819108 Kinua 26-5-16
2. ↑ http://www.nytimes.com/2010/04/05/technology/05snopes.html?_r=0 Kinua 26-5-16